Sámi vuorasolbmot

Árbemáhtolaččat ođđa áiggis

Árja lohpidii ahte jus beassat Sámediggái, de áigut sihkkarastit čielga vuoraspolitihkalaš nannema. Iežamet mielas leat mii ožžon áigái oba ollu!

•  Árja oaččui mieđáhusa dasa ahte ásahit sierra vuorrasiidráđi Sámediggái. Vuorrasiidráđđi lea nannen Sámedikki vuorasolbmuid politihkalaš barggu.
•  Árja lea earenoamážit dorjon prošeavttaid iešguđet sámi guovlluin maid ulbmil leamaš nannet fálaldagaid sámi vuorasolbmuide, nugo mat lohkan-ja čállinveahkkeprošeakta vuorasolbmuide Guovdageainnus, dearvvašvuođa deaivvadeapmi sámi vuorasolbmuide Skániin ja Divttasvuonas, deaivvadanbáiki vuoras sámiide Álttás. Die leat buorit vuogit movt sáhttá láhčit buori eallima vuorasolbmuide mas lea árvu.

Vuorasolbmuid máhttu, dieđut ja eallinvásáhusat leat nannoseamos vuođđogeađggit mat min servodagas leat masa lea huksejuvvon. Vuorasolbmuin lea álo leamaš guovddáš sadji sámi servodagas.

Árja dat lei mii álggahii vuorasolbmuid politihka nannema Sámedikkis. Mii dáhkidit ahte áigut dainna joatkit mannjel 2017 válgga

Árja dáhttu:

– Ahte sámi vuorasolbmot adnojuvvojit árbečeahppin, ja sidjiide galgá láhččojuvvot sadji oasálastit servodagas iežaset eavttuid vuođul.

– Viiddidit lohkan-ja čállinveahki maid Sámediggi doarjjui Guovdageainnu suohkanis, ja eará suohkaniin gos leat sámegielat vuorasolbmot.

– Ahte vuorasolbmot galget beassat orrut ruovttus nu guhká go fal lea vejolaš, juste doppe gos sii iežas hálidit, ja eai galgga bákkuin fárrehuvvot dainna ákkain ahte fertejit orrut guovddáš báikkiin.

– Ahte sámi vuorasolbmot geat dárbbašit divššu galget sáhttit orrut heivehuvvon dikšunásodagain dahje bearašviesuin iežaset lagasbirrasis.

– Ahte Sámediggi ráhkada ollislaš vuorasolbmuidplána, mas árvvoštallet vuoras sámiid eallineavttuid ja fuolahusfálaldagaid, ja gos sin sadji servodagas čuvgejuvvo.

– Ahte sámi vuorasolbmuid riekti beassat hupmat sámegiela dearvvašvuođabálvalusain ja eará almmolaš orgánain nannejuvvo. Dulkonfálaldaga ferte viiddidit ja nannet.

– Ahte sámi vuorasolbmuin, geat leat institušuvnnain, galgá leat lágas nannejuvvon  riekti beassat sámástit ja ipmirduvvot iežaset eatnigillii.

– Sámi vuorasolbmuin galgá leat lágas nannejuvvon riekti oažžut divššu mii heive sin kulturduogážii.

– Ahte sámi vuorasolbmuin, geat leat institušuvnnain, galgá leat lágas nannejuvvon riekti beassat borrat biepmu masa árbevirolaččat leat hárjánan iežaset ruovttuin.