Árjjain ođđa áigái Sámedikkis!
Árja hirpmástuhtii buohkaid maŋŋá Sámedikki 2009-válggaid. Árja mii vuođđuduvvui jagi ovdal, oaččui golbma áirasa Sámediggái ja Árjjas lei velá Sámedikki várrepresideanta, Láilá Susanne Vars, olles áigodagas 2009–2013. Árjjas ledje lahtut buot golbma politihkalaš lávdegottiin Sámedikkis, ja iešguđetge ráđiin.
Maŋŋá 2013-válggaid oaččui Árja njeallje áirasa Sámediggái. Árjjas ledje lahtut buot Sámedikki lávdegottiin. Árja searvvai ođđa ráđi nammudeapmái juovlamánus 2016. Bargiidbellodaga Vibeke Larsen válljejuvvui Sámedikki presideantan ja Ronny Wilhelmsen várrepresideantan. Árjja presideantaevttohas 2017-válggaide, Inger Eline Eriksen, nammaduvvui ráđđelahttun. Mariann Wollmann Magga, Bargiidbellodat, ja Lars Filip Paulsen, Olgeš, leiga maiddái Sámediggeráđis.
Árja oaččui ovtta áirasa Sámdiggái maŋŋá 2017-válggaid, Inger Eline Eriksen Fjellgren, gii čohkká Sámedikki ealáhus- ja kulturlávdegottis dán áigodagas.