Sámegielat oahpponeavvuid ođasmahttima dárbu
Árja oaidná ahte sámi oahpponeavvuid buvttadeapmi lea bázahallan ođđaáigásaš dárbbuid ja gáibádusaid ektui. Mánát, nuorat ja ollesolbmot geat galget oahppat sámegiela, ja maiddái sii geat galget oahpahallat giela viidásat, celket ahte otná oahpponeavvo dilli ii leat dohkálaš. Sihke oahpaheaddjit, skuvlaoahppit ja váhnemat leat cealkán ahte lea váilevašvuohta ođđaáigásaš oahpponeavvuide ja eará veahkeneavvuide mat sáhttet leat mielde movttiidahttimin oahppat giela ja ovdánahttit giela.
Árgabeaivi lea dađi bahábut nu ahte sámegieloahpaheaddjit fertejit várret iežaset friddjaáiggi ráhkadit dohkálaš ja áigeguovdilis oahpponeavvuid oahpahussii, vai oahppis lea lága miel` dorvvolaš sámegieloahpahus.
Árja áigu dán Sámediggeáigodagas bargat dan ovdii ahte buvttaduvvojit eanet ođđa sámi oahpponeavvut, jietnagirjjit, App`at, neahttaspillat ja prográmmat mat movttiidahttet sámegiela oahppat. Dát galgá leat mielde geahpedeamen oahpaheddjiid dili ja maiddái leat doarjjan váhnemiidda sin beaivválaš giellamátkkis. Mii oaidnit dán dehálaš lávkin ahte seailluhit sámegiela, min váibmogiela.
Jon-Christer Mudenia
Árja 2. evttohus nuortaválgabiire
