Stuorradikkis dorjot duohtavuođakommišuvnna
Árja lea duhtavaš go dál orru eanetlohku Stuorradikkis doarjumin Árjja evttohusa 2014:s ásahit duohtavuođa- ja soabadankommišuvnna mii galgá čalmmustahttit Stáhta dáruiduhttinpolitihka. Jođiheaddji Árjjas Trond Einar Karlsen oaivvilda dál lea áigi guorahallat dáruiduhttima.
– Árja lei vuosttaš Sámedikkis gii 2014:s evttohii ahte ferte guorahallat dáruiduhttima almmolaš kommišuvnna bokte. Mun jáhkán mii leat dárbbašan dáid jagiid oahpásmuvvat áššiin vai jurdda láddá, dadjá Trond Einar Karlsen.
– Árja háliida giitit Sosialisttalaš gurutbellodaga go leat ovddidan ášši Stuorradikkis. Sámedikki measta ovttajienalaš mearrádus dál álggus geassemánus lea veahkkin nannet ášši.
Árja lea maiddái evttohan Sámedikkis ahte galggašii ásahit dakkár musea mii čájeha dáruiduhttima historjjá ja maiddái jahkásaš soabadanvahku sápmelaččaide ja dážaide mii čalmmustahtášii sámi áššiid. Dát evttohusat soitet šaddat muhtin dain bohtosiin guorahallankommišuvnnas.
Árja lea sihkkar ahte go dát kommišuvdna albmaláhkái čalmmustahttá dáruiduhttima, de dagašii dat min sámiid boahtteáiggi olu geahpibut.
– Jáhkán dat olu álkidahttá min sámiid barggu ealáskahttit min giela, kultuvrra, identitehta ja servvodateallima, loahpaha Trond Einar Karlsen.
