Ii gávdno vuođđu Riehppovuona ruvkedoibmii

Ođđasat

Válddahallat mo minerálat váikkuhit máilbmeekonomiijii ii leat ággan ruvkeplánaid čađahit davviguovlluin nugo NHO ja Norsk Bergindustri orruba oaivvildeamen. Duohtavuohta bissu duohtavuohtan vaikko vel dan biehttalage. NHO seamma láhkai go Olgeš/Ovddádusbellodat-ráđđehus, ii váldde vuhtii servodatekonomaid ja mariidnabiologaid dieđuid: Ii gávdno vuođđu jáhkkit Riehppovuona ruvkedoaimma servodatekonomalaččat gánnáhahttin, ja ii sáhte eahpidit dasa ahte mearradeponiija nuoskkida meara ja uhkkida guolásteapmi ja biebmanealáhusa.

Lea gal buorre go Norsk Bergindustri orru váldimin vuhtii ILO-konvenšuvnna eamiálbmogiid rivttiin, nugo ieža dadjet čállosis mii almmuhuvvui ođđajagemánu 11. beaivve. Dalle galggašii searvi oktan fitnodagain geaid sii ovddastit, čuovvulit eamiálbmogiid rivttiid gáibádusaid ja riikkaidgaskasaš norpmaid ja njuolggadusaid fitnodagaide ja olmmošvuogatvuođaide. Muhto nu sii eai bargga go áigot álggahit Nussir-prošeavtta Riehppovuonas vaikko eai leat ovdalgihtii ožžon lobi dasa guoskevaš olbmuin. Nussir ASA ii oppa leatge geahččalan soabadit Sámedikkiin iige sámiin geaidda sin plánat váikkuhit, iige gulahallan sáhttágo oppanassiige prošeakta čađahuvvot. Sii leat dušše árvaladdan mo dan sáhtášii čađahit. In dieđe mo NHO ja Norsk Bergindustri leaba rávven Nussir ASA, muhto eai sáhte leat leamaš ráhppes rávvagat jus jo ii leaš nu ahte fitnodat ii leat čuvvon rávvagiid.

Ii dárbbaš oktage eahpidit dasa ahte ruvkeprošeakta duvdá eret árbevirolaš, sámi ealáhusaid – ja danin rihkku álbmotrievtti man Norga lea geatnegahtton čuovvut sámiid ektui. Sámedikki bealis oaidnit mii ahte Nussir ii livčče galgan oažžut luoitinlobi, iige galggašii fidnet doaibmanlobi. Ráđđehus ii leat váldán Sámedikki ákkaid vuhtii, iige leat gullan guoskevaš sámiid ákkasteami, ii guldal servodatekonomaid iige láhkačehpiid rávvagiid, ja nu duvdá ráđđehus ášši duopmostuoluid meannudeami guvlui, mii loahpa loahpas sáhttá bissehit olles prošeavtta. Ii beakkánis Nussir-prošeaktage sáhte duvdilit lágaid ja rivttiid čihkosii.

 

Sámediggeráđđelahttu Inger Eline Eriksen lea čállán debáhttačállosa.

Gnist - web som funkler