Sámi mánnasuodjalusmánáid dilli dohkkemeahttun

Preassadieđáhus

– Árja evttoha ásahit sámi mánáide kultuvrralaš doarjjaplána

Árja lea fuolastuvvan sámi mánáid diliin ja riektesihkkarvuođain mánnasuodjalusáššiin. Dál sirdet mánáid ruovttuin amas kultuvrralaš gearggusvuođaruovttuide ja sadjásašruovttuide.

– Ná sámi mánát masset oktavuođa sámi eallimii – bearrašiin, sogain, gielain ja kultuvrrain. Eai mánát oaččo makkárge erenoamáš čuovvoleami dahje fálaldaga. Mánáide lea dát roassun go manahit iežaset sámi identitehta, dadjá Árjja sámediggeáirras Inger Eline Eriksen.

Árjja mielas dát vuohki rihkku sihke mánáidkonvenšuvnna ja Norgga lágaid.

– Norgga eiseválddiin lea geatnegasvuohta mo dálá ortnet doaibmá. Árja oaivvilda ahte Sámediggi ferte áŋgiruššat kultuvrralaš doarjjaplána ásaheapmái sámi mánáide mánnasuodjalusáššiin. Doarjjaplána sihkkarastášivččii sámi mánáide gullevašvuođa bearrašii, lagasbirrasii ja sámi kultuvrii ihkinassii gos mánát ásaše, dadjá Hartvik Hansen guhte gullá Sámedikki bajásšaddan-, fuolahus- ja oahpahuslávdegoddái.

– Dákkár plána geatnegahttášivččii mánnasuodjalusa fállat sámi fálaldaga sámi mánáide, oaivvilda Hansen.

Čujuhuvvo ahte dákkár doarjjaplána lea ásahuvvon Austrálias, Cultural support plan for an Aboriginal or Torres Strait Islander child, ja das sáhttá fuomášumiid viežžat. Norgga eiseválddit berrejit álggahit dákkár prošeaktabarggu ovttasráđiid sámi ásahusaiguin.

Gnist - web som funkler