Verddevuođa gáhttet ja riidduid eastadit

Ođđasat, Ukategorisert

Árja fuolastuvvá go gullá ahte Porsáŋggus leat bohciidan riiddut badjeolbmuid ja báikeolbmuid gaska. Báikki olbmot ovdamearkka dihte Goarahat-guovllus muitalit ahte dál guhtot bohccot doppe gos ovdal eai leat guhton ja ahte badjeolbmot leat dolvon bohccuid sulluide gulakeahttá báikeolbmuin. Dát váikkuha báikeolbmuid árbevirolaš doaimmaide go sii leat dáidda guovlluide luoitán vierccaid guohtumii ja sii leat doppe mannen, lubmen, sarren ja nu ain.

Sámediggi ferte Árjja mielas ásahit gaskaomiid mat eastadit dákkár riidduid. Mii oaivvildat ahte Sámediggi gálggašii áŋgiruššat verddevuođa vuođu ealáskahttit ođđa hámis, nu ahte verddevuohta sáhttá nannet oktavuođaid seamma láhkai go ovdal. Okta čoavddus livččii ásahit juohke guohtunguvlui gulaskuddanorgána badjeolbmuide ja báikeolbmuide. Dákkár ortnet livččii maiddái buorre álgun Sámedikki boahttevaš áigumuššii hálddašišgoahtit boazodoalu. Nana ovttasbargu sámi ealáhusaid gaskka lea hirbmat dehálaš sámi ealáhusaid boahtteáigái.

Verddevuohta lea geađgejuolgi Sámi servvodagas ja galggašii vuhtiiváldot buot politihkalaš surggiin Sámedikkis. Mii evttohat ahte Sámediggi ovddida ášši gos árvvoštallá mo nannet ja seailluhit verddevuođa iešguđetge servvodatsurggiin.

Gnist - web som funkler