Árja doarju árktalaš eanadoalu, mehcásteami ja oahpponeavvuid

Ođđasat

Bušeahttaovttasbargoguoimmit Sámedikkis vuoruhit árktalaš eanadoalu, meahcásteami ja oahpponeavvuid buvttadeapmái Sámediggeráđi evttohusa ektui.

– Mii leat duđavačča go ovttas Olgešbellodagain, NSR:in ja Johttisámiidlisttuin nannet doarjjavuogádaga sámi guovlluid eanadollui. Sámediggi doarju dán láhkai sin geat barget eanadoaluin. Jus áigut lihkostuvvat nuoraid ja nissonolbmuid oažžut searvat ealáhussii, de fertet nannet doarjjavuogádaga, dadjá Árjja parlamentáralaš jođiheaddji Láilá Susanne Vars.

2015-bušeahtas nannejuvvo ealáhus 1,9 miljovnna ruvnnuin.

Oahpponeavvobuvttadeapmái ja oahpahussii lasihuvvo doarjja 1,9 miljovnna ruvnnu.

Árja lea dáid áššiid lihkostuvvan bušehttii duddjot:

– Sámediggi ásaha neavvunbálvalusa mo ovddidit vuoigatvuođagáibádusaid Finnmárkkokommišuvdnii.

– Sámediggi bivdá ráđđehusa vuođđudit kommišuvnna mii galgá iskat dáruiduhttinpolitihka váikkuhusaid, erenoamážit mearrasámi guovlluin.

– Sámi allaskuvla oažžu doarjaga ásahit árbediehtoguovddáža.

– Oahpponeavvoportála ovttas.no, spábbačiekčanlihttu FA Sápmi ja Deanu mánáidteáhter ožžot lasihuvvon doarjagiid.

– Sámi meahcásteami oahppoprošeavttat ruhtaduvvojit ain.

Árja lea hui duđavaš go lea lihkostuvvan gáibádusain meahcásteami nannet. Bušeahtas vuoruhuvvo 2 miljovnna ruvnnu meahcásteapmái ja meahcástanealáhusa buktagiid reidemii.

Gnist - web som funkler